Түбэлэр айар талааннарын көрдөрөллөр

Өрөгөйдөөх Улуу Кыайыы 80 сылыгар аналлаах Түбэ нэһилиэгин түөлбэлэрин икки ардыларыгар ыытыллар “Аартык” түөлбэ Людмила Григорьеваыытааччылаах “Ким да умнуллубат, туох да умнуллубат” самодеятельнай фестиваль аһылынна.

Кэнсиэри сыаналыыр,  дьүүллүүр сүбэ састааба, ыҥырыылаах ыалдьыттар,  ыаллыы сытар Хатырык, Маймаҕа нэһилиэктэриттэн кэлбиттэрэ кыттааччылары өссө долгутта. Ол курдук, Саха Республикатын культуратын  туйгуна, өрөспүүбүлүкэтээҕи “Өбүгэ ситимэ” күрэх Гран При хаһаайката, культура, үлэ ветерана Светлана Васильевна Дьяконова; “Сайдам” норуот айымньытын  дьиэтин дириэктэрэ, түсчүт, “Тур выходного дня” духовной туризм ааптара, төрүттээччитэ нэһилиэк депутата, уһун үйэлэнии  спортинструктора, “За вклад музейного дела” мэтээл  хаһаайката Елена Владимировна Ефремова-Сандаара Иэйиэхсит; Нам улууһун тойук, оһуохай  күрэхтэрин хас да төгүллээх кыайыылааҕа, Нам улууһугар олоҥхо күрэхтэрин 2 төгүллээх Гран При, өрөспүүбүлүкэтээҕи Олоҥхо ыһыаҕа, Муҥха, Куйуур олоҥхото күрэхтэр, эдэр ыччат түһүлгэлэрин хас да төгүллээх “Удьуор утумун тутааччы”, “Түөлбэ олоҥхоһута” анал ааттар хаһаайката, өрөспүүбүлүкэтээҕи үгүс эстрада  ырыаларын күрэҕин лауреата, дипломана, хас да төгүллээх кыайыылааҕа, өрөспүүбүлүкэ ыччатын, Нам улууһун олоҥхоһуттарын, оһуохайдьыттарын түмсүүлэрин чилиэнэ Сайдыы кыыһа Дайыына Саарын сыаналаатылар.

“Айхал” СК оҥорбут балаһыанньатыгар олоҕуран “Аартык” түөлбэ барыта 10 нүөмэри көрдөрдө. Манна ирдэбил быһыытынан Нам улууһун суруйааччыларын тылларыгар 2 хор ылланна. Кэнсиэр В. Зырянов “Ким да умнуллубат, туох да умнуллубат”, И.Д. Винокуров-Чаҕылҕан “Хайыһар” ырыаларынан саҕаланна.

Хормейстер Сардаана Харитонова хору олус сатабыллаахтык салайан кыттааччылар бэркэ табыллан ыллаатылар. Хор тахсар, сааһыланар бириэмэтигэр Ким Попов А.И. Софронов-Алампа“Саха ырыата” хоһоону ааҕан көрөөччүлэр биһирэбиллэрин ылла (салайааччы О. Куприянова). Түөлбэ саамай артыыс дьонноро Ольга Захарова, Николай Григорьев, Мария Новикова, Ким Поповсыанкалары бэрт итэҕэтиилээхтик оонньоотулар. Саалаҕа мустубут дьону нарын куоластаах Айталина Саввинова, нэһилиэктэр икки ардыларыгар ыытыллар фестиваль хас да төгүллээх дипломана, солбуллубат ырыаһыта Анатолий Новиковбиирдиилээн ырыаларынан кэнсиэри олус тупсардылар, сэргэхситтилэр. Эр дьон, кэрэ аҥардар квартет, фольклор нүөмэрдэрэ инникитин өссө тупсарын туһугар, ситэрэн-хоторон биэрэргэ дьүүллүүр сүбэттэн олус туһалаах сүбэлэри ыллылар. Александра Птицына бэлэмнээбит “Синий платочек” үҥкүүтэ, литературнай композицияҕа сценарий суруйбут Ольга Захарова, суруктары аахпыт уолаттар: Дьяконов Ганя, Ефимов Эрхаан, Григорьев Талбан дьүүллүүр сүбэ хайҕабылын ылыаҕын ыллылар. Бу тэрээһиҥҥэ саҥа талааннар арылыннылар диэтэхпитинэ сыыспаппыт буолуо. Ол курдук, Светлана, Егор Константиновтар, Анатолий Захаров, Евдокия Захарова курдук дьоннору бэлиэтии көрдүбүт.

Кыратыттан кырдьаҕаһыгар диэри, ким да туора турбакка, бары олус көхтөөх дьон буолан, олох кылгас бириэмэ иһигэр бэлэмнэнэн кэнсиэрдээтилэр. Бу фестиваль-кэнсиэргэ “Аартыктар” чахчы түмсүүлээхтэрин, муста түстэхтэринэ барытын кыайалларын өссө төгүл дакаастаатылар.