Кулун тутар 26 күнүгэр улахан кылаас оҕолоругар төрүт многоборьеҕа «Үрүҥ уолан» күрэс буолла. Бу күрэстэн бэйэтин кэмигэр Намтан төрүттээх «Дыгын оонньууларын» бөҕөстөрө тахсыбыттара. Быйылгы бириис пуондата – 300 тыһ. солк. Турнир СӨ үөрэҕириитин туйгуна Петр ПОПОВ сырдык кэриэһигэр уон тохсус төгүлүн ыытылынна.
- 15/05/2024
- 8
- нет
Быйылгы кыайыылааҕынан Д.П. Коркин аатынан Чурапчытааҕы спорт оскуолатын бэрэсидьиэнэ, Төлөйтөн төрүттээх Петр Попов таҕыста. Киниэхэ саха быһаҕын уонна 50 тыһ. солк. туттардылар.
«Мин многоборьенан дьарыктаммытын балтараа сыл буолла. Инниктин улахан сыалым – “Дыгын оонньууларыгар” кыттыы, ол туһугар күн аайы эрчиллэрбин», — диэтэ кыайыылаах.
Иккис миэстэни Нам Түбэтиттэн Милан Чепалов ылла уонна 30 тыһ. солк. наҕараадаланна, «боруонсаны» Дьокуускайтан Саха гимназиятын үөрэнээччитэ Слепцов Айаал ылла, кини 20 тыһ. солк. бирииһи тутта. Ону таһынан кэлэн кыттыбыт уолаттар номинация, спонсордартан анал бириис ыллылар.
Быйыл Дьокуускайтан, Чурапчыттан, Амматтан, Намтан, Мэҥэ-Хаҥаластан 22 күүстээх уол кытынна. Уолаттар биэс көрүҥҥэ кииристилэр: үс куобах, тутум эргиир, хапсаҕай, мас тардыһыы, кууллаах сүүрүү.
Күрэһи Спорт министиэристибэтин, Б. Манчаары аатынан “Модун” национальнай спорт көрүҥнэрин киинин, многоборье федерациятын, чааһынай спонсордар өйөбүллэринэн Түбэ нэһилиэгин дьаһалтата, Түбэ орто оскуолата, Петр Попов дьиэ кэргэнэ сыл аайы ыыталлар.
Сылын аайы, бу турнирга өрөспүүбүлүкэбит араас муннуктарыттан 40-ча эдэр ыспарсымыанар кыттыыны ылаллар.
СӨ үөрэҕириитин туйгуна Петр Попов сырдык кэриэһигэр улахан кылаас үөрэнээччилэрин ортолоругар XIX-с төгүлүн ыытыллар “Үрүҥ уолан” үрдүк таһымнаахтык ааста
